Xardín Botánico da Ría do Burgo
e Aula da Natureza Juan Lembeye Lartaud

A beira da ría do Burgo, o Xardín Botánico é un dos lugares con máis encanto de Culleredo ao que se accede con facilidade desde o Paseo Marítimo.

Aquí atoparemos elementos representativos da arquitectura popular como o hórreo que nos recibe á entrada desde o Paseo Marítimo ou unha recreación dos xardíns de estilo francés como os que embelecen os pazos máis importantes de Galicia.

Hai, tamén, un espazo reservado para hortas urbanas que cultivan de maneira ecolóxica os veciños do municipio.

O Xardín Botánico é un lugar para coñecer e gozar da beleza e particularidades de distintas especies da flora autóctona e foránea de maneira autoguiada, seguindo as indicacións dos paneis informativos que atoparemos ao longo do percorrido.

Os mais pequenos gozarán na área de lecer infantil e os adultos poderán relaxarse contemplando a beleza da ría.

Un lugar destacado do Xardín Botánico é a Aula da Natureza dedicada ao recoñecido naturalista e alcalde de Culleredo, Juan Lembeye Lartaud. Ao longo do ano programa múltiples actividades relacionadas co medioambiente, exposicións de destacados artistas e todos os veráns acolle o Festival Burgo Jazz.