Desde o achado dos restos do Apóstolo, Santiago de Compostela foise convertendo nun dos maiores centros de peregrinación da cristiandade.
A trama de vías que chegaban desde todos os puntos de Europa a Compostela funcionaba como rede de transmisión de información, de cultura e de creación, do que é testemuña o inxente patrimonio do que hoxe goza quen decide percorrer calquera dos camiños a Santiago.

O Camiño Inglés era unha deses itinerarios. Empregado polos peregrinos do norte de Europa, principalmente ingleses, irlandeses, xentes da costa occidental francesa e flamencos, que chegaban en barco a Ferrol ou ao porto do Burgo de Faro.

No século XII o Camiño de Faro, unha das rutas principais do Camiño Inglés, partía do arciprestado de Faro, o que hoxe son os municipios da Coruña, Arteixo e Culleredo.

O Burgo de Faro, no inicio do Camiño, era unha próspera cidade que dispoñía de protección real, eclesiástica, nobiliaria e militar.
Os Templarios garantían a seguridade a quen decidía continuar a súa peregrinación desde aquí.

Os peregrinos que seguen o ramal coruñés do Camiño Inglés, poderán gozar en Culleredo de espazos como a ría do Burgo onde conviven en harmonía home e natureza, conxuntos de interese como o Xardín Botánico e un sorprendente patrimonio arquitectónico que nos leva desde época medieval á que pertencen a ponte do Burgo e a Igrexa de Santiago, á arquitectura da industrialización que nos mostran as estruturas da fábrica de Cros.

Desde a Igrexa de Almeiras, acompañados polo Cabaleiro de Almeiras, poderemos botar a vista atrás e contemplar a beleza da paisaxe que acabamos de percorrer.

A sinalización de frechas amarelas e cunchas de vieira facilitará o noso percorrido polo municipio desde O Portádego ata a Ponte da Xira.

Aínda que son menos de 100 kms os que nos separan da tumba do Apóstolo, se decidimos peregrinar seguindo este ramal coruñés do Camino Inglés, podemos obter a Compostela cumprindo unha serie de requisitos que variarán en función da orixe do peregrino.

Bo Camiño!