O paseo marítimo do Burgo é, por mérito propio, un dos bens máis prezados do concello. En todas as estacións do ano está ateigado de xente que se achega a gozar dun día, mañá ou tarde ao aire libre. É empregado para facer deporte e ao longo do percorrido existe un carril bici e tamén un skatepark, situado á altura de Fonteculler. Sen dúbida é un espazo único para gozar da natureza. Ademais esta área atópase na Reserva da Biosfera Mariñas Coruñesas e Terras do Mandeo.

Este paseo percorre a ría do Burgo, accidente xeográfico compartido cos concellos de Cambre, Oleiros e A Coruña, na desembocadura do río Mero. Neste punto o río está xuntándose coas augas do mar. Durante un percorrido de arredor de 3,5 km o visitante poderá pasear e gozar do camiño, o mesmo que se fose un peregrino, posto que o Camiño Inglés coincide con parte do paseo. Tamén se pode observar o traballo dos mariscadores que traballan na ría e aproveitan as mareas baixas para recoller o froito do mar.

Por se aínda fose pouco, este lugar imprescindible para todo aquel que visite o concello ofrece a posibilidade de observar aves únicas ao longo do seu percorrido. O agradable espazo da ría fai que moitas aves pasen os invernos ou paren no seu camiño cara a outros lugares na ría. A mellor época de birding é durante o outono, inverno e primavera, aínda que tamén ao longo dos meses restantes se poden observar especies diversas. Ao longo do paseo marítimo existen paneis informativos que axudan a comprender o medio que admiramos.

No mesmo paseo atopamos tamén o Xardín Botánico e a Aula da Natureza Juan Lembeye Lartaud. Nel pódese visitar, sen moverse de Culleredo, xardíns palacegos, viaxar ata outras partes do mundo e descubrir exemplares exóticos. En definitiva, un lugar único onde perderse e atopar tesouros doutras terras. Ademais de poder gozar das exposicións que teñen lugar na Aula da Natureza.

No noso camiño tamén podemos visitar unha ponte medieval, a ponte do Burgo!

Sen lugar a dúbidas esta zona constitúe un dos lugares destacados na visita ao Concello de Culleredo.